Shaadi ka shauq to taqreeban sabko hi hota hai aur jo ye kehtay hain ke unhe ye shauq nahi unhe darasal ye shauq sabse ziada hota hai. Phele zamanay mai tou kaha jata tha ke larkian apni shaadi ka khuwaab bohat kam umar se hi dekhne lagti hain. Magar ajkal ka haal to ye hai ke larke apne pairon par kharay nahi hotay aur unhe apni dulhan chaheyai hoti hai.

Bollywood movies dekh dekh ke hum sab ke dimag mai yehi khayal beth gaya hai ke shaadi ke baad sab kuch theek hojata hai aur apki zindagi ki sari musibatein khatam hojati hai aur ap pursukoon aur khushi ke sath apni baqi zindagi guzarte hain. Ghalat! Shaadi ke bad to apka asal imtehan shuru hojata hai. Aksar apko lagta hai ke apne apni zindagi ki sabse bari bewakoofi bohat kam umar mai hi kardi. Phir apko yaad ata hai ke shaadi se phele apki zindagi kitni sukoon mai thi. Na miya/biwi ki behas, na bachon ki zimedari aur na latadad kharchon ki tension. Bus ap aur apki zindagi. Tab ap sochte hain ke jis cheez ko ap apni zindagi ki sab se exciting aur adventurous cheez samajh rahe hotay hain wo aur kuch nahi balke apne pair par kulhari marne ke baraber hota hai. Taqreebanye sub wo kehtay hain jo shaadi ke shauq mai shaadi already kar chuke hotay hain.

Ab dosri taraf ki kahani sunein. Jo bhi single larke aur larkian issay parh rahe hongay yaqeenan wo bhi din mai apna acha khasa waqt ye sochne mai guzarte hongay ke unki shaadi kisse hogi? Unki zindagi kesi guzre gi? Unki sari musibaton ka hal kab nikle ga? Larkian to phir bhi sharam ke maray apne ami abu ko shaadi par zor nahi detein magar larke wo tou maa baap ke peechay parh jatay hain ke unke liye rishta dhunde. Aik musibat bana kar rakh detay hain jab tak ke unke maa baap unke liye larki ki talash shuru nahi karte. Aur larkian khushi se apni tasveerain khichwati hain takay rishte wali aunty ke pass bhijwain.

Ap khud batein kia ap single hain ya shaadi shuda? Agar ap shaadi shuda hain to yaqeenan ap bhi baqi shaadi shuda logon ki tarhan baat karein gay. Aur baqi wo sub jo single hain aur din mai bhi apni shaadi ke sapne dekhtay hain, Unke liye ye paigham hai ke wo shaadi ko aik fantasy na lein. Zarur shaadi mai apke kafi shauq pure hojatay hain magar ye sach hai ke un sub shauqon ki qeemat par apko bari mushkilon ka samna karna parhta hai.

Apko kia lagta hai? Kia ye zaruri hai ke har aik shaadi ke bad pachtata hai? Kia aisa ho sakta hai ke aik larki ki saas uski maa ban kar uske sath rahe? Ya phir sari saanse aik jaisi hi hoti hain? Shaadi yaqeenan aik khubsurat rishta hai agar ke hum usme compromise karna seekh jayein aur sirf apni khushi ke baray main na sochein. Apka kia khayal hai? Kia ap ko ab bhi shaadi ka shauq hai ya ap single hi theek hain?


Leave a Reply


SIGN INTO YOUR ACCOUNT CREATE NEW ACCOUNT

Your privacy is important to us and we will never rent or sell your information.

 
×
CREATE ACCOUNT ALREADY HAVE AN ACCOUNT?

 
×
FORGOT YOUR DETAILS?
×

Go up